मनू यंगाना सिगु खिपं थिकेकं मिइफइगु अन्धविश्वासं सुनाकोथीया मिसायात स्याःगु द्पनय् ३ म्हसित ज्वन

मनू यंगाना सिगु खिपं थिकेकं मिइफइगु अन्धविश्वासं  सुनाकोथीया मिसायात स्याःगु द्पनय् ३ म्हसित ज्वन


असोज २४ -  मनू यंगाना सिगु खिपं थिकेकः मिइफइ धइगु अन्धविश्वासय् ३ म्ह मनूतयसं छम्ह मिसायात स्याःगु दु। खिपं मियाः लखौं तका कमे यायेगु लोभय् मिसायात स्याःगु द्पनय् प्रहरीइ यलं ३ म्हसित ज्वंगु दु।

महानगरीय अपराध महाशाखा, बानेश्वरं यल महानगरपालिका–१७, सुनाकोठीइ ४५ दँया कमला तामाङयात स्याःगु द्पनय् शनिस्चरे नगरपालिका-८ मंगलबारे छेँय् जुया थुथाय् यल महानगरपालिका-२८, हरीसिद्धि च्वनिम्ह २० दँया सुमन मगर, मकवानपुर,रक्सिराङ गाउँपालिका-५, प्याङचे टोल छेँय् जुया थुथाय् यल  महानगरपालिका-२८, हरिसिद्धि, न्हूगुबस्ती च्वनिम्ह २३ दँया सविन प्रजा, व प्रज्ञाया कला मकवानपुरया १८ दँया प्रविना प्रजा माझीयात ज्वंगु खः।

महाशाखाया एसएसपी चन्द्रकुवेर खापुङया कथं इमिसं खिपं थिकेकः मिइफइगु अफवाहलय् विश्वास यानाः तामाङया गपतँय् खिपंतं क्वातुक्क चिनाः  स्याःगु लूगु दु। तामाङयात स्यायेधुकां वयागु तिसाः व मोबाइल लुटे यानाः फरार जूगु अवस्थाय् ज्वनाः अनुसन्धान यानागु धकाः खापुङं धयादिल।