लकडाउनया दथुइ लुँःयागु सिंहासन ब्वइगु परम्परां निरन्तरता काइगु

थौं तछलाथ्व पुन्हि, ज्यापुन्हि

लकडाउनया दथुइ लुँःयागु  सिंहासन ब्वइगु परम्परां निरन्तरता काइगु
सामाजिक संजाल


जेठ २३ - थौं तछलाथ्व पुन्हि, ज्यापुन्हि। नेवा: परम्पराकथं ज्यापुन्हियात दकलय् ता:हाक:गु न्हिकथं काइ।

पश्चिमेली परम्पराकथं जून २१ तारीखयात दकलय् ता:हाक:गु दिंकथं कयात:सां नेवा: नगुमांकथं ज्यापुन्हियात हे दकलय् ता:हाक:गु दिंकथं काइ। दकलय् ता:हाक:गु दिं ज्यापुन्हिखुनु यलया मंग: लायकुलिइ विशेष संगीत महोत्सव जुइगु या:।

जुजु सिद्धिनर्सिङ मल्लया पालंनिसें मंग: लायकुलिइ थौंया दिनय् संगीत महोत्सव जुयावयाच्वंगु दु। संगीत महोत्सवया झ्वलय् जुजु सिद्धिनर्सिङ मल्लं चिनाथकूगु स्वीछपु राग हालेगु चलन दु। मेघमलहार सहित स्वीछपु रागलिसे हे सम्बन्धित सिद्धिनर्सिङ मल्लं हे तयार या:गु बिलंपौ नं ब्वयगु चलन दु। लिपा सिद्धिनर्सिङ मल्लया काय् जुजु श्रीनिवास मल्लयात दान ब्यूगु सिंहासन नं थौंया दिनय् मंग: लायकुलिइ ब्वयगु चलन सुरु जूगु खः । यल, ओकुबहा:या जोथाजु शाक्यं सम्यक महादान न्यायका: थुगु सिंहासन जुजुयात हे दान ब्यूगु ख:। उल्सांनिसें ज्यापुन्हिखुनु सिंहासन नं ब्वयगु चलन सुरु जूगु खः।

कोरोना भाइरसया संक्रमण पनेत लकडाउन जुयाच्वंगुलिइ यक्व धार्मिक परम्परां निरन्तरता कयामच्वंगु अवस्था जुसाः न थाैं मंग: लायकुलिइ सिद्धिनर्सिङ मल्लया बिलंपौ व श्रीनिवास मल्लया सिंहासन ब्वया: दाफा भजन हालेगु परम्परां निरन्तरता काइगु पाटन संग्राहालयया म्यूजियम अधिकृत सुरेश लाखें न नेपालमण्डल टेलिभिजनयात जानकारी बियादिगु दु।