थौं  विश्व सम्पदा दिवस

थौं  विश्व सम्पदा दिवस


बैशाख ५ -  थौं  विश्व सम्पदा दिवस हनाच्वंगु दु। दँय् दसं अप्रिल महिनाया १८ तारिखय् थुगु दिवस हनिगु खः। दिवसया झ्वलय् नेपालय् नं सम्पदा संरक्षणय् बः बिया थीथी ज्याझ्वः जुइगु खः।

विश्व सम्पदा दिवस सन् १९८२ निसें हनावयाच्वंगु खः। स्वनिगः व लुम्बिनी लागायात संयुक्त राष्ट्रसङ्घीय शैक्षिक, वैज्ञानिकलिसें सांस्कृतिक संघठन युनेस्कों सांस्कृतिक सम्पदा लागाया रुपय् सूचीकृत याःगु दु।स्वनिगःनापं येँय्, यल व ख्वपया ७ गू सम्पदा दुथ्याकाःतगु दु।

२०७२ सालया भ्वखाचं नेपाःया महत्त्वपूर्ण सांस्कृतिक सम्पदाय् क्षति याःगु खः। भ्वखाचं ३२ जिल्लाया द्वोछिति सम्पदाय् क्षति यागुलिं आःतक ४९० पुनर्निर्माण जूगु दुसा मेगु ल्यदनिगु सम्पदा पुनर्निर्माणय् यक्व ई काःगु दु।

दुनावंगु व स्यंगु सम्पदा इलय् हे पुनर्निर्माण मजूगुलिं सम्पदाया महत्त्व पाः जूगु दुसाः गुलिखे लोप जुइगु अवस्थाय् थ्यगु दु। पर्यटन व्यवसायलय् नं असर जूगु दु । राष्ट्रिय पुनर्निर्माण प्राधिकरण लिसें पुरातत्व विभागं सम्पदाया पुनर्निर्माण व संरक्षणय् निरन्तर ज्या जुयाच्वंगु व फुक्कं सम्पदाया पुनर्निर्माण व जिर्णोद्धार छक्कंल यायेफैमखु धागु दु।

महत्त्वपूर्ण धरोहरया रुपय् दुगु रानीपुखु पुनर्निर्माण जुइधुक्कुंगु दुसाः धरहराया पलेसाः दयेकूगु भ्यूटावर वइगु ११ गते प्रधानमन्त्री केपी शर्मा ओलीइ उलेज्या यानादिइत्यगु दु । सिंहदरबारया मुख्य प्रशासनिक भवनया उत्तर, दक्षिण व पूर्वया ज्या क्वःचायेकाः प्रधानमन्त्री लिसें मन्त्रिपरिषद्या ज्याकु अन हे तयेधुक्कुंगु दु। मरूसतः व बुंगद्यःया देगः  थज्याःगु सम्पदाया ज्या जुयाच्वंगु दु।

२९४ गुम्बाया मर्मत सम्भार जूगु राष्ट्रिय पुनर्निर्माण प्राधिकरणं धागु दु। सांस्कृतिकलिसें पुरातात्विक सम्पदाया जिर्णोद्धार व पुनर्निर्माणय् लिबासाः नं भ्वखाय् लिपाया पुनःर्निर्माणया झ्वलय् महत्त्वपूर्ण उपलब्धि हासिल जूगु राष्ट्रिय पुनर्निर्माण प्राधिकरणया प्रमुख कार्यकारी अधिकृत सुशील ज्ञवालीइ धयादिल।

खुयाः अमेरिका थ्यकेधुक्कुंगु दुर्लभ मूर्तियात छुं दिं न्हय् लितहगु दु। नेपाः हयेत तालाःगु लक्ष्मी-नारायण मूर्तियात पुरातत्व विभागं जिम्मा कयाः सुरक्षित यानाः तयेत पाटन सङ्ग्रहालयय् छ्वगु खः। डल्लास म्युजियम अफ आर्टय् २०७७ साल मंसिरय् उगु मूर्ति लुगु खः।