बोडेया म्ये प्वाःखंकिगु जात्रा थुगुसि मजुइगु

बोडेया म्ये प्वाःखंकिगु जात्रा थुगुसि मजुइगु


चैत २१ - कोरोना भाइरसया संक्रमण फैले जुइफुगु अवस्थायात बिचा याना मध्यपुर थिमिया बोडेया म्ये प्वाःखंकिगु जात्रा न मयाइगु जुगु दु । कोरोना भाइरसया संक्रमणया जोखिमयात बिचा याना बोडेया म्ये प्वाःखंकिगु जात्रा मजुइगु निर्णय जुगु धकाः न्ह्येकः तक म्ये प्वाः खंकादिम्ह बुद्व कृष्ण बागः श्रेष्ठं धयादिगु खः ।

जात्राया झवलय् चैत मसान्त खुन्हू  बोडे महालक्ष्मी देगया प्राङ्गणय् यसिं थनिसाः बैशाख २ गते  म्ये प्वाः खंकिगु जात्रा जुइगु खः । छगु इलय् बोदेशय् दुखः ब्यूम्ह पिशाचयात तारण तया ज्वना देशय् दुःख मजुइमाः,  रोग, अनिकाल मवयेमाः धकाः ७ दँ तक म्ये प्वाः खंकवये माःगु वाचा याकाः त्वताः ब्युगु किंबदन्ती दु । वाचा कथं न्ह्येकः तक पिशाचं म्येः प्वाः खंकवगु व अनलिपां बोडेवासीतपाखें हे थथे यायेगु याना परम्परा च्वंगु धइगु किंवदन्ती दु ।