चक्रपथया विस्तार खण्डय् ट्राफिक मतः तइगु

चक्रपथया विस्तार खण्डय् ट्राफिक मतः तइगु


माघ १२ - सडक विभागं चक्रपथया विस्तार जुइधुक्कुंगु ठासय् ट्राफिक मतः तइगु जुगु दु।

विभागं २ दँ न्हय् चीन सरकारया आर्थिक  ग्वाहालिइ विस्तार जुगु कोटेश्वर–कलङ्की सडकय् ७ गू ठासय् मतः तयेत्यगु खः। विभागं सवारीसाधनया चाप अप्व दुगु व लँजुवा यक्व न्यासी जुइगु लँय् ट्राफिक मतः तयावयाच्वंगु दु। थ्व लँय् चालू आवदुने सम्झौता यायेगु योजना दुगु विभागया सडक सुरक्षा तथा ट्राफिक शाखाया प्रमुख कृष्णनाथ ओझां धयादिल।

विभागं चालू आवदुने जडीबुटी, कोटेश्वर, थापाथली, दरबारमार्ग व केशरमहलय् मतः तयेत्यगु खः। ५ गू चुक व अनया ८ गू जेब्राक्रसिङय् मतः तइगु सवारी व्यवस्थापन तथा ट्राफिक शाखाया प्रमुख ओझां धयादिल। मतः तयेगु लागि १ करोड १५ लख तकाय्  ठेक्का सम्झौता जुगु खः।

सरकारं २ दँ न्हयनिसें स्वनिगःया थीथी लँय् व जेब्राक्रसिङय् ट्राफिक मतः तयावयाच्वगु खः।