हाकूगु धिबायात वैधानिक यायेत्यगु धासें आयकर ऐन संशोधन प्रस्ताव लितकायेत माग

हाकूगु धिबायात वैधानिक यायेत्यगु धासें आयकर ऐन संशोधन प्रस्ताव लितकायेत माग


असोज ८- ट्रान्सपरेन्सी इन्टरनेसनल नेपालं अवैध धनयात वैधानिक यायेगु उद्देश्यनापं सरकारं आयकर ऐन संशोधन यायेत्यगु धासें विरोध याःगु दु। 

सरकारं संसदय् पेस याःगु आर्थिक आयकर ऐन, २०५८ संशोधन प्रस्तावय् अवैध धन वैधानिक यायेगु दुने दुने उद्देश्य कयाः थीथी पूर्वाधारया क्षेत्रय् लगानी यायेबलय् ‘लगानीया आयस्रोत मालेगु जुइमखु’ धइगु व्यवस्था प्रस्ताव याःगुयात कया गम्भीर ध्यानाकर्षण जूगु संस्थां धागु दु।  

'गैरकानुनी रुपय् देय्दुने वा पिने उच्च राजनीतिक, प्रशासनिक व व्यावसायिक व्यक्तितपाखें भ्रष्टाचार वा कर मपुसें सुचुकाःतगु हाकूगु धिबाः वैध यायेत ग्वाहालि याइगु थ्व प्रस्ताव स्वीकृत जुसाफ थुकिइ भ्रष्टाचारयात प्रश्रय बिइगु, कर छली अप्वयेकिगु, नियमित करदातायात निराश याइगु, हाकूगु सम्पत्ति शुद्धीकरण लिसें निर्मलीकरण जुइगु व नीतिगत भ्रष्टाचारया नमूना जुइगु निश्चित दु,' संस्थाया अध्यक्ष पद्मिनी प्रधानाङ्गपाखें जारी विज्ञप्तिइ न्ह्यथनातःगु दु।  'थ्व ज्या नेपाःया संविधानया भावना, मेगु कानुन व भ्रष्टाचारविरुद्धया अन्तर्राष्ट्रिय प्रतिबद्धताया विपरीत नं जुइ।' धकाः विज्ञप्तिइ धयातःगु दु।  'थज्याःगु प्रस्ताव तुरुन्त लितकायेत सरकारया प्रमुख दल व उकिया साझेदार राजनीतिक दलतय्त ट्रान्सपरेन्सी इन्टरनेशनल नेपाल जोडदार माग याइ,' धकाः विज्ञप्तिइ उल्लेख दु।