नेपालय् फैले जूगु युके व भारतीय भेरियन्ट छु खः?

नेपालय् फैले जूगु युके व भारतीय भेरियन्ट छु खः?


बैशाख ९ - कोरोना भाइरसं स्वरुप परिवर्तन तीव्ररुपं जुयाच्वंगु दु। थथे स्वरुप परिवर्तन याःगु भाइरसया संक्रमक क्षमता न्हापांसिबे अप्व जुइगु विज्ञतयसं धागु दु।

आः खास यानाः भारतीय भेरियन्ट व युके भेरियन्ट नेपालय् फैले जूगु दु। शुक्रराज ट्रपिकल तथा सरुवा रोग अस्पतालया प्रवक्तालिसें सरुवा रोग विशेषज्ञ डा.अनुप बास्तोलाया कथं थुथाय् नेपालय् भारतीय व युके भेरियन्ट फैले जूगु दु।

मानव शरीरया कोसिका अर्थात् भाइरस दुहाँवइगु बिन्दुइ भाइरसं याइगु रुप परिवर्तन भरियन्ट खः। तर आःतक कोरोनां परिवर्तन याःगु स्वरुप फरक–फरक जूगु वयकलं धयादिल। थुथाय् युके भरियन्ट, भारतीय भेरियन्ट, साउथ अफ्रिकन भेरियन्ट, ब्राजिल भेरियन्टलगायतया भेरियन्ट दु।

भारतीय भेरियन्टं आःतक स्वगूगु स्वरुप( ट्रिपल भेरियन्ट) परिर्वतन यायेधुक्कुंगु डा.बास्तोलां धयादिल। वय्कलं भाइरसं गुलि यक्व स्वरुप परिवर्तन याइ भाइरसया संक्रमक क्षमता उलि हे थहाँवनिगु डा.बास्तोलां धयादिल। नेपालय् थथे भाइरसया स्वरुप परिर्वतन स्वास्थ्य मापदण्डया पालनय् लापरबाहीया कारण जूगु वय्कलं धयादिल।

भारतीय भेरिन्ट मेगु भेरियन्टसिबें अप्व संक्रामक खनेदुगु दु। आः भारतय् न्हिया न्हिथं ३ लखं मल्याकसिके संक्रमण जुयाच्वंगु दुसाः अनया मृत्युदरया ल्याः नं थहाँवनाच्वंगु दु।

नेपालय् नं थ्व भेरियन्टया संक्रमण दर अप्वयावंगु चिकित्सकतयसं धागु दु। डा.बास्तोलाया कथं स्वास्थ्य सुरक्षाया मापदण्डयात क्वाःतुक्का पालना मयाःसाः या दर भयावह जुइ।

भारतीय भेरियन्ट संक्रमण जूपिं मनूत तसकं गम्भीर अवस्थाय् थ्यनिगु वयकलं धयादिल। भारतीय भेरियन्ट संक्रामकलिसें कडा खालया जूगु वय्कया धापू दु । थथे स्वरुप परिवर्तन याइगु भेरियन्टपाखें संक्रमण जूबलय् शरीरया रोग प्रतिरोधात्मक क्षमतां नं ज्या मबिइगु डा.बास्तोलां धयादिल।

आः प्रयोग जुयाच्वंगु कोरोनाविरुद्धया खोप प्रभावकारी जुसाः नं थ्व भेरियन्टपाखें फुक्कं सचेत जुइमाःगु व स्वास्थ्य सुरक्षाया मापदण्ड क्वाःतुक्कां पालना यायेमाःगुलिं वय्कलं  बः बियादिल।