लकडाउन फ्यासुकेगु निर्णयलिसें गाडीया चाप अप्वल

लकडाउन फ्यासुकेगु निर्णयलिसें  गाडीया चाप अप्वल


बैशाख २७ - सरकारं लकडाउन छुं फ्यासुकेगु निर्णय यासेलिइ स्वनिगलय् गाडीया चाप अप्वगु दु । सरकारं उद्योग, कलकारखाना लिसें कृषिया ज्या चायेकेगु व निर्माण सामाग्री दुगु गाडीयात उखेथुखे याके बिइगु निर्णयलिसें गाडीया चाप अप्वगु खः । थ्व नापं चिग्वःगु  गाडीया चाप न अप्वगु दु ।

सरकारं लकडाउनयात व्यवस्थित याना विकास निर्माणया ज्याखँ अप्वकेगु निर्णय यासेलिइ यातायात आवागमनयात सहजीकरण यानाच्वनागु धकाः येँया प्रमुख जिल्ला अधिकारी जनकराज दाहालं धयादिल। येँय्, यल व ख्वपया प्रमुख जिल्ला अधिकारी लिसें सुरक्षा निकायका प्रमुख नाप म्हिगः च्वगु बैठकं लकडाउनयात कायम यासें विकास निर्माण, उद्योग , कलकारखानाया  सामान ल्हइगु  गाडीयात पास म्वाःगु निर्णय यागु खः । थ्व निर्णय गृह मन्त्रालयलय् छुवयेगु धकाः प्रजिअ दाहालंं धयादिल ।

बैठकं मनूत म्वः म्वः जुइके मबिइगु व सरकारं क्वछिनातगु ज्याखँ याके बिइत थप कडा यायेगु निष्कर्ष पिकागु खः । निर्माण सम्बन्धी सामान ल्हइगु तःग्वगु गाडी बहनीसिया ८ ताई निसें सुथसिया ६ ताईतक, बैंक व  वित्तीय संस्थाया गाडी सुथसिया ९ ताई निसे  ९ ता त्याईतक व सनिलया ३ ता त्याईनिसें  ५ ताईतक जक न्हयाके दइगु महानगरीय प्रहरी ज्याकु रानीपुखुया प्रमखु, डीआइजी विश्वराज पोखरेलं धयादिल ।