पासा पुच गुठी यूके लण्डनया नेवाः परम्परा संरक्षणसम्बन्धी वेबिनार

पासा पुच गुठी यूके लण्डनया नेवाः परम्परा संरक्षणसम्बन्धी वेबिनार


मंसिर २४ - पासा पुच गुठी यूके लन्डनं ‘नेवाः परम्परा ल्यकेत समसामयिक अभ्यास’ नांयागु गुठी सेमिनार श्रृंखला क्वःचागु दु।

नेवाः संस्कृतिया संरक्षण यायेगु उद्धेश्यनापं २९ नोभेम्बरय् जुगु वेबिनारय् नेवाः संस्कृतिविद, प्राज्ञ, अभियन्तालिसें नेवाः संस्कृति ह्यमितयगु ब्वति दुगु खः। नेपाल सम्बत ११४१ या भिन्तुना बिसें संस्थाया अध्यक्ष रुकमणी मानन्धरं फुक्कंसित लसकुस यानादिगु खः।

संस्थाया ट्रष्टी बोर्डया सभापति ओजेश सिंहं ज्याझ्वःया बारेय् जानकारी बिसें नेवाः संस्कृतिया संवद्र्धनय् यायेफइगु न्हूगु ज्याया विषयलय् चर्चा यानादिगु खः। सिंहया नायस्वीइ न्ह्यागु न्हापांगु सत्रय् अनुसन्धानकर्ता काशीनाथ तमोटं नेपाल सम्वतया महत्व व हाथ्या, सुप्रिया मानन्धर व रुक्सना कपालीं छुं इ न्हय् पिहाँवगु सौर्य नेपाल सम्वत, डा. महेशमान श्रेष्ठं समकालिन समाजय् नेवाः व थुकिया चुनौतिबारे थःथःगु ज्यापाै न्ह्यब्वयादिगु खः।

लन्डनय् दुगु सोआस विश्वविद्यालयय् नेपाल भाषा सोसाइटीया कजि  म्यारिलेना फ्रिजोनया नायस्वीइ जुगु निगूगु सत्रय् सुनिता डंगोलं क्यालीजात्रा, अलिना ताम्राकारं ‘बाख न्याने वा’, लोरिना स्थापितं अजि संस्थायाबारे जानकारी बियादिगु खः।

पासा पुच गुठी यूके लन्डनया पूर्व अध्यक्ष संयुक्त श्रेष्ठया नायस्वीइ जुगु अन्तिम सत्रय् अधिकारकर्मी मल्ल के सुन्दरं नेवाः गुठीया स्वराज्य अधिकार, मार्बर्ग विश्वविद्यालयया डा. फेलिक्स ओटरं प्राचीन नेवाः साहित्य व पाण्डुलिपी संरक्षण लिसें अध्ययनय् समकालिन अभ्यास, डा. ज्योति तुलाधरं नेवाः मुल्य मान्यता सम्बन्धय् चर्चा यानादिगु खः ।

स्वगुलिइ सत्रया ज्यापाैया प्रस्तुतिलिपा पासा पुच गुठी यूके लन्डनया सल्लाहकार डा. सचेतन तुलाधरं मध्यस्तता याःगु सत्रय् सहभागीदथुइ सहलह जुगु खः। ओजेश सिंहं बेमिनार क्वचायेकुसें फुक्कंसित सुभाय् देछानादिगु खः।

१५० म्ह मल्याकसियां ब्वति कागु ज्याझ्वः फेसबुकपाखें लाइभ प्रशारण याःगु खः।