हलिं नेवाः न्ह्यसः लिसः कासाय्  यलबुकः स्वां  न्हाप

हलिं नेवाः न्ह्यसः लिसः कासाय्  यलबुकः स्वां  न्हाप


मंसिर ५ - वल्र्ड नेवाः अर्गनाइजेसनं (डब्लुएनओ) यानाच्वंगु हलिं नेवाः न्ह्यसः लिसः कासाःया बिजं (फाइनल) कासाःय्  यलबुकः स्वां  न्हाप जूगु दु। म्हिगः शनिबाः येँय्या चागलय् च्वंगु जगत सुन्दर ब्वनेकुथिइ जूगु बिजं कासाय् यलबुकः स्वां पुचया  इसिका महर्जन, देशना देशार व आकृति महर्जन १३५ ल्याः कया न्हाप लाःगु दु।

अथेहे कासाय् गुलाफ स्वां पुचया सुजित श्रेष्ठ, गृस्मि मानन्धर व सचेतना मानन्धर ११५ ल्याः हया ल्यू जूगु दुसाः सिन्हस्वां पुचया प्रनवनाथ श्रेष्ठ, आहाना तुलाधर व रेसु कंसाकार १०५ ल्याः कया लियांल्यू लाःगु दु। कासाः यलबुक स्वां, गुलाफस्वां, सिन्ह स्वां व अजुस्वां पुच दथुइ जूगु खः। कासाय् अजुस्वां पुचया इच्छा अवाले, सदिका महर्जन व निश्चल बज्राचार्यं ४५ ल्याः कयाः हपाःया ठासय् लाःगु खः।

म्हिगःया कासाः  लण्डनं न्ह्यसः लिसः कासा प्रविधि कमिटीया कजि संयुक्त श्रेष्ठ न्ह्याकfदीगु खः।

कासाया जजकथं त्रिविवि पू्र्व कुलपति प्रा डा कमलकृष्ण जोशी व पद्म कन्या क्याम्पसया अर्थशास्त्र विभागया प्रमुख डा रीना तुलाधर च्वनादीगु खः। नेपालय् जूगु कासाय्  डब्लुएनओ नेपाल च्याप्टरया कजि शाक्य सुरेन, भाषाविद् पाैभाः सायमि, न्ह्यसः लिसः कासा प्रचारप्रसार कमिटीया ल्यूकजि उदेन न्हूसायमि, पत्रकार सिल्भिया राजोपाध्याय्, पत्रकार विगेन तुलाधर,नेवाः सूचना केन्द्रया कजि राजेन्द्र रंजित लगायतया व्यक्तित्वपिनिगु ब्वति दुगु खःसा नेपालं पिनेच्वनादीपिं डब्लुएनओया नायः सिजन श्रेष्ठ, न्ह्यसः लिसः कासाःया कजि विमलमान श्रेष्ठ,  न्ह्यसः लिसः निर्माण कमिटीया कजि केशरमान ताम्राकार लगायतया पदाधिकारीपिंन्सं जुममार्फत ब्वति कयादीगु खः।

न्हाप जूगु पुचयात ६०० अमेरिकी डलर, ल्यूयात ४५० अमेरिकी डलर, लियां ल्यूयात ३०० अमेरिकी डलर व हःपाःयात १५० अमेरिकी डलर सिरपाः बीगु डब्लुएनओं धागु दु। सिरपा वइगु शनिबाः मंसिर ११ गते नेपालय् ज्याझ्वः याना बिइत तयारी जूगु दु। 

वंगु भाद्र ५ निसें शुरू जूगु थुगु कासाःय् थीथी देय्या २० पुचलं ब्वति काःगु दुसाः सेमिफाइनल न्हय् तकया ९ कासाः भर्चुअल रूपं जुयाच्वगुलिं अनलिपाया सेमिफाइनल २ व फाइनल १ यानाः ३ कासाः भौतिकलिसें जुममार्फत जूगु खः।

न्ह्यसः लिसः कासा ताःलाकेत विमलमान श्रेष्ठ (क्यानाडा)या कजिस्वीइ १५ म्हसिगु पुचःनीस्वनातःगु दु। पुचलय् संयुक्त श्रेष्ठ (बेलायत) व दीपेशमान शाक्य (आयरल्याण्ड) ल्यूकजिकथं च्वनादीगु दुसाः दुजलय् केशरमान ताम्राकार (अमेरिका), कृष्ण चखुं (बेलायत), उत्तम माकजु (क्यानाडा), भुषणलाल श्रेष्ठ (अमेरिका), नरेश ताम्राकार (क्यानाडा), रश्मिला प्रजापति (नेपाल), शाक्य सुरेन (नेपाल) शोभित शाक्य (इस्टोनिया), रजनी श्रेष्ठ (बेल्जियम), समन्त वज्राचार्य (अमेरिका), कमल श्रेष्ठ (न्युजिल्याण्ड),  उदेन न्हूसाय्मि (नेपाः) दुजःकथं च्वनादीगु दु।

कासा ताःलाकेत दया शाक्य (अमेरिका)या कजिस्वीइ योग्यता व निर्णायक कमिटी, केशरमान ताम्राकार (अमेरिका)या कजिस्वीइ न्ह्यसः लिसः निर्माण कमिटी, संयुक्त श्रेष्ठ (बेलायत)या कजिस्वीइ न्ह्यसः लिसः कासा प्रविधि कमिटी, भूषणलाल श्रेष्ठ (अमेरिका)या कजिस्वीइ अर्थ व्यवस्थापन समिति, रश्मिला प्रजापति संयोजक व उदेन न्हूसाय्मि  (नेपाः) सह संयोजक जुयादीगु प्रचारप्रसार कमिटी गठन याःगु दु । सामाजिक संजाल संयोजककथं लालिमा श्रेष्ठ, आशुतोष बाराही व पुजल वज्राचार्ययात ल्यःगु दु। डब्लुएनओया नायः सिजन श्रेष्ठ, संरक्षक दया शाक्य व नारायण राजभण्डारीयात सल्लाहकारकथं ल्यःगु दु । 

हलिंमय च्वपिं नेवाःतय्त छथाय् हयेगु आजुं डब्लुएनओ ने.सं. ११३१ झिछस व स्वीछदँ गुंलाथ्व चतुर्दशी खुन्हू पलिस्था जूगु खः। पलिस्था जूगु १० दँया लसताय् डब्लुएनओ हलिं नेवाः न्ह्यसः लिसः कासाः यानाच्वंगु खः।