विश्व प्रेस स्वतन्त्रता सूचकाङ्कय् नेपाः ११२ गू ठासय्

थगुने सिबें खुगू ठाय् क्वय्

विश्व प्रेस स्वतन्त्रता सूचकाङ्कय् नेपाः ११२ गू ठासय्


बैशाख २१ - थाैं मे ३ अर्थात् विश्व प्रेस स्वतन्त्रता दिवस । थुगुसिइ ‘भय व पक्षधरतामुक्त पत्रकारिता’ नारा नापं  थ्व दिवस हनाच्वंगु दु। सन् १९९३ या संयुक्त राष्ट्रसङ्घीय महासभां अनुमोदन यासेलिइ मे ३ लय् विश्व प्रेस स्वतन्त्रता दिवस हनेगु याःगु खः । थुगुसिइ कोरोना सङ्क्रमणया कारण ज्याझ्वः मदुसाः नं नेपाल पत्रकार महासङ्घ लगायतं प्रेस स्वतन्त्रताबारे डिजिटल संवाद, सहलह व सञ्चार माध्यमय् सामग्री प्रकाशन/प्रसारण मार्फत थीथी ज्याझ्वःयाना दिवस हनेत्यगु दु। प्रेस स्वतन्त्रताया आधारभूत सिद्धान्त, पत्रकार सुरक्षाया समग्र अवस्थाया समीक्षा, प्रेस स्वतन्त्रता सेनानी लिसें पत्रकारिता पेसा निर्वाहया झ्वलय् जीवन उत्सर्ग यापिन्त हना थ्व दिवस हलिन्यंक हे हनिगु खः।

 रिपोर्टर विडाउट बोर्डरं (आरएसएफ)  पिकागु  सन् २०२० या विश्व प्रेस स्वतन्त्रता सूचकाङ्कय् नेपाः ११२ गू ठासय् लागु दु  ।आरएसएफया वाार्षिक विश्लेषण कथं नेपाः १८० देयमध्ये ३५.१० ल्याः नाप थगुने सिबें खुगू ठाय् क्वय्  ११२ गू ठासय् थ्यगु खः । थगुने २०१९ य् नेपाः धलःया १०६ गू ठासय् लागु खः । सन् २०१८ य् धासाः  नेपाः थ्वः धलःया १०० गू ठासय् दुगु खः । बहुलवाद, सञ्चार माध्यमया स्वतन्त्रता, स्वनियन्त्रण, पारदर्शिता, पूर्वाधार, हिंसा लिसें दुर्व्यवहार लगायत सूचक विश्लेषण याना थ्व सूचकाङ्क तयार जुइगु धकाः आरएसएफं धागु दु । दक्षिण एसियाय् नेपाःया ठाय भुटान व माल्दिभ्स सिबें ल्यूने दु । थुगुसिइ  भुटान ६७ गू व माल्दिभ्स ७९ गू ठासय् लागु दु। अफगानिस्तान १२२ गू, श्रीलङ्का १२७ गू , भारत १४२ गू, पाकिस्तान १४५ गू व बङ्गलादेश १५१ गू ठासय् लागु दु ।

नेपाल पत्रकार महासङ्घं २०५६ सालनिसें नेपालय् जुइगु प्रेस स्वतन्त्रता हननया घटनातयगु अभिलेखीकरण यानावयाच्वंगु दु । नेपाल पत्रकार महासङ्घ सञ्चार अनुगमन एकाइलय्  २०७६ सालय् प्रेस स्वतन्त्रता हननया ६० गू घटना अभिलेख जुगु महासङ्घं धागु दु । थुकिइ ९४ म्ह पत्रकार व ३ गू  सञ्चार संस्था याना ९७ पीडित जुगु न्ह्यःथनातगु दु।