स्वनिग:या त:धंगु नख: येँन्या: सुरु

स्वनिग:या त:धंगु नख: येँन्या: सुरु
फाइल किपाः


असोज २ - स्वनिग:या त:धंगु नख: येँन्या: थौं विधिवत्‌रूपं सुरु जुल। येँया हनुमानध्वाखाय् सुथसिया ६ः५१ मीनेटया साइतय् य:सिं थना: येँन्या:नख: सुरु जूगु ख:।

येँन्या: नख: शुरु जूगु चिं कथं येँया बसन्तपुरय् हनुमानध्वाखा अड्डाया प्रतिनिधि, कुमारीछेँया चिताइदार, गुथि संस्थानया पदाधिकारी व गुरुज्यूया पल्टनया उपस्थितिइ य:सिं थनेगु चलन दु। काभ्रेया नालाया य:सिंगुँइ कयाह:गु स्वीनिकु ल्हा: ता:हाक:गु य:सिं वंगु कायाष्टमीखुनु हनुमानध्वाखाय् थ्यंकेह:गु ख:।

थ्वहे झ्वलय्, हनुमानध्वाखाय् थें यल, ख्वप किपू पन्ति नुवाकोट, मकवानपुर गढी, लिसें पुलांगु दरवार लागाय् नं य:सिं थनेगु चलन दु। येँन्या: सुरु जूगु चिंकथं त्वा:त्वालय् नं यँमा:द्य: स्वनेगु याइ। न्हापा पालिजा:स्वां कायत व:म्ह ईन्द्रयात गथु छम्हसिनं ज्वना: चिनात:गु बाखंया आधारय् नेवा:तयसं येँन्या:बले त्वा:त्वालय् यँमा:द्य: थनीगु ख:।

येँन्या: नख:या झ्वलय् दशावतार प्याखं, द्य:प्याखं, भद्रकाली व लाखे प्याखं नं पिथनेगु चलन दु। य:सिँ थनेधुंका: कुमारी, भैरव व गणेशयात थ्यंमथ्यं स्वीताजिया अष्टमंगल मरि देछाइ। 

अथेहे, येँन्या:या आकर्षणकथं जुयाच्वंगु पुलुकिसि, लाखे लिसें सव:भक्कु प्याखं नं थौं हे पिदनी। न्हिनय् मजिपा:या लाखे व हल्च्वया सव:भक्कु प्याखं पिदनीगु येँन्या: नख: व्यवस्थापन समितिइ धागु दु । थौं न्यतं सव:भक्कु प्याखं पिदनी। उखे, सनिलय् येँया किलाघलं पुलुकिसि पिथनेत्यंगु दु। 

न्हापा ईन्द्रं पालिजा: स्वां कायत भौक्यबय् थ: ऐरावत किसियात त्व:ता: किलाघ:या जंगलय् स्वां थ्व:व:गु बाखं दु। उबले गथु छम्हसिनं ईन्द्रयात ज्वना: चिनातसेंलि ईन्द्रयात मा-मां ऐरावत किसि उखेथुखे चा:ह्यूजूगु प्रतिककथं पुलुकिसि पिथनीइ।

अथेहे, थौ दच्छिया दुने मदुपिंनिगु थथितित लँ धुछि मतः तया उपाकु वनेत्यंगु दु।

थाैं थःगु यःसिं असोज ८ गते नानिचाया: क्वचायका: चान्हय् क्व:थला: थुगुसीया येँन्या: नख: नं क्वचाइ।